A Protik: epô mélékè a america zan’alon abu me fô bihi nu..

#Komiaza.com – E’nguè me zen jio ta’ fô eyi akèzi a Yaundè a ne lekun ala’ pangoup, wouf: ebo mechuzia ghote pô memia pi po te me pepa wè te po mi. Ewuo keu yi Sandy Boston, agho nwet Briagade Anti Sardinard. A tuo guia bu po tsihi lekun All Bamileke Convention ebo bu po tsihè Laakem. Chuzia pin gue chi’ pup, me tsui awouè nanhan a mba. Me zan’alon guè Me nagwi ke gho fvet sardine edok deknè me nu mi essi dzang’alah. Eguè a juo san, me fô gho jio fitu ayè zomett abu pop. .

Nagwi ken tchiè tsop. Tè Atuo mô afu zen nohon adeko? Asane zi ane liela tsop pia ane mesan leghim a juè lah. Epô memia sobné mela’ pup. Tè epè nahan me ya ashuinte a ne lezen Mo’o eguè a tou bwené anè lah zimpè. Te tepoupô ebo atuo mô ate fuzen nohon adeko. Me fô mett paha po moho Ferdinand Ngoh Ngoh ke nou tampico mboho.

Anu jio afuo egho ? Me ke ton me fô mba mélékè a yaundè a ne lezen Nwet laha Kamalun. Ninyi a tchitè menu Paul Biya me kekui wop. Papop ke wuè chun’né. Ajoumi alah si zéhé agho lè po leguia e’tchountè pa’ mezen piè a Nwet lah pup. Até gho wuop, moho Ferdinand Ngoh Ngoh asi ebu aton’ho lah. A ken ton tè bo me fela, me ngopna, me nwet me tisson, me depitè paha me senatè, me ministle, te lekne mo’.

Epô mélékè ke jio pup te tem apu ekekip eguè tela’ ego paha kèkè. Edhè enahan asi e tchitè anu met. Tegue zokô egê po ya me fô mbargo. Me fô pimpè te mbargo melah mi poke chuen’alah. Tè epô mélékè leu guè me fô pi po ke gio Etudi, po lè dekne aleghue pô gho chi’go a ne lekun All Bamilike Convention (ABC-NORTH AMERICA).

All Bamileke Convention sigo lekun, leka pô meleke a America. Me liehè a Etats-Unis po Canada. Epô mélékè tchouté ekak. Egue wo pup e tchui egong-gong a fè zimpè, me zen mipè, mezoho mimpè, lefô tsimpè. Po gha bin guha etonho me fô tepô chiehè enansi tè lekak mett ezihi. Agho pup pangoup a lok edjio abohon pa’ pimpè enan pup. Tè a pin go mo’fi pimpè ghe wè etsii pa’a, ekap tuô abu puopi po lejio lekun me epon wop.

Tetah, akegho lekiè, me zu’té ejio pa’ ala nghe makné ewuo pup. Mela’ emoh pô mélékè pu tuo azop adzem eghè ebaa me lezen nkap lah eto. Ta’ fô woyi ake te gio a Yaundè met, ebo lepe tisi tchitè yi. Melah pup, tèbo epô mélékè ke ghè po zen enahan asi etsa’ meketé mop tè zehé me fô pi papo chi eghonô.

Epô mélékè ke leguè po pihè lepeu tchiô mett melami me fô essi go ebang zo me me tepon lessane. Pô zi kuo ane protik, ane ekeukeu paha edoko ta’ha alah. E guè me fô tsop lekua meghim lekua pi pô ke yaundè mett po si zaka kezulà ? Me ya me fô nkap, guiawop po metua, ekwett anoh. Eguia wop zo tetiè moh. Po kedjio aghoyi pogho ko tapné ka ? Po kan Paul Biya te tsihè ason fentè kikihi wop paha etchiè emo’ pôpop egho ? ekeu wuo pu tchite meleke pi po pu go lah pangoup.

MOMOKANA men AL’AJOUH